ලැප්ටොප් පරිගණකය නිවැරදිව භාවිතා කරමු...
නිවැරදිව ඔබේ ලැප්ටොප් පරිගණකය භාවිතා කිරීමෙන් එහි ආයුකාලය වැඩි වන අතරම එය හොඳ කාර්යක්ෂමතාවයකින් යුතුව ධාවනය වේ. එමෙන්ම ලැප්ටොප් පරිගණකය හදිසි අනතුරු වලින් ආරක්ෂා කර ගැනීමටද මේ උපදෙස් වැදගත් වේ. එවැනි අවස්ථාවකදී අළුත්වැඩියා කිරීමකට යෑමට වඩා එයින් ආරක්ෂා වී සිටීම වඩාත් හිතකරයි. මෙහි සඳහන් උපදෙස් පිළිපැදීමෙන් ඔබේ ලැප්ටොප් පරිගණකයත් අවම නඩත්තුවකින් යුතුව වැඩි කාලයක් භාවිතා කළ හැකි අතරම සැමවිටම වේගවත්ව ක්‍රියාත්මක වේ.
ලැප්ටොප් පරිගණකය ජංගම භාවිතයට නිමවා ඇති නිසා නිවස පුරා ඕනෑම තැනක හිඳ භාවිතා කල හැකියි. මේ නිසා වෙනත් වැඩක යෙදී සිටිමින්ම ලැප්ටොප් පරිගණකය භාවිතා කිරීමට බොහෝ දෙනෙක් පෙළඹී සිටී. එහි වැරැද්දක් නොමැති වුවත් මෙවැනි අවස්ථාවලදී ඔබ විශේෂයෙන් සැලකිලිමත් විය යුතුයි. ලැප්ටොප් පරිගණකය අසල කෑම බීම ගැනීමේදී එය මතට ඉහිරීමට වැඩ ඉඩක් පවතින නිසා ලැප්ටොප් පරිගණකය අසල කෑම බීම ගැනීමෙන් වැළකී සිටිය හැකිනම් වඩාත් සුදුසුයි. බොහෝවිට තේ, කිරි, සිසිල් බීම වැනි දෙයක් පානය කරමින් ලැප්ටොප් පරිගණකයෙන් යමක් කියවීම හෝ නැරඹීම බොහෝ දෙනාගේ විනෝදාංශයකි. නමුත් මෙවැනි අවස්ථාවකදී මේ දියර පරිගණකයේ යතුරු පුවරුව මත ඉහිරිය හැකියි. යම් හෙයකින් මේ ආකාරයෙන් දියරයක් පරිගණකය මත ඉහිරුනහොත් ඒ මගින් පරිගණකයේ අභ්‍යන්තර උපාංග ලූහුවත් (Short Circuit) වීම, දත්ත හානිවීම හෝ උපාංග දැවීයාම වුවත් සිදුවිය හැකියි. ඔබ කොතරම් ප්‍රවේශම් වුවත් හදිසියේම මෙවන් දෙයක් සිදුවීමට වැඩි සම්භාවිතාවයක් පවතින නිසා දියර වර්ග හැකි තරම් පරිගණකයෙන් ඈත්ව තබන්න. එමෙන්ම දියර වර්ගයක් භාවිතා කළ යුතුම නම් හොඳින් ආවරණය කල හැකි භාජනයක් භාවිතා කරන්න. එවිට භාජනය පෙරලීමකින් ඉහිරී නොයන නිසා අවදානමක් පැන නොනගී.
ආහාර ගැනීමේදීත් මේ ආකාරයෙන්ම පරිගණකයට අහිතකර තත්ත්වයන් ඇතිවේ. විශේෂයෙන්ම පාන්, බනිස්, කෙටි කෑම ආදී දේ ආහාරයට ගන්නා විට ඒවායේ කුඩා කැබලි යතුරු පුවරුවේ යතුරු අතර තැන්පත් වේ. මේවා නිසා කූඹින් වැනි කුඩා සතුන් පරිගණකය අභ්‍යන්තරයට ඇදී එන අතර උන් යතුරු පුවරුවේ රබර් බොත්තම් කා දැමීමෙන් යතුරු හරිහැටි ක්‍රියාත්මක නොවිය හැකියි. එමෙන්ම බොහෝ විට එවැනි සතුන් පරිගණක අභ්‍යන්තරයට ඇදී ඒම නිසා පරිපථ අතර ලූහුවත් වීම් සිදුවීමටත් වැඩි ඉඩකඩක් පවතී. එසේම මෙවැනි ආහාර කැබලි, තෙල් හා කහට පැල්ලම් ආදිය නිසා ලැප්ටොප් පරිගණකයේ පෙනුම ද අපිරිසුදු ආකාරයක් ගනී. කල්යෑමේදී මේවා ඉවත් කිරීමට අපහසු විය හැකියි. කෑම බීම ගැනීමෙන් පසු අත් හොඳින් පිරිසිදු කර ගත හැකි නම් මේ ආකාරයෙන් අපිරිසුදු පැල්ලම් ඇති වීම වළකී. ඇති මේ නිසා හැකි සෑම විටෙකම ලැප්ටොප් පරිගණකය අසල හිඳ ආහාර පාන ගැනීමෙන් වැළකිය හැකි නම් එය ඔබේ පරිගණකයේ යහ පැවැත්මට හේතුවේ.
මෘදුකාංග ආරක්ෂාව ගැන සැලකීමේදී සැමවිටම ක්‍රියාකාරී, යාවත්කාලීන කළ, හොඳ තත්ත්වයේ ප්‍රතිවෛරස මෘදුකාංගයක් භාවිතා කරන්න. හැම විටම එය නිවැරදිව ක්‍රියාත්මක වන්නේ දැයි සැලකිලිමත් වන්න. අහිතකර පරිගණක වැඩසටහන් ඔබේ පරිගණකයට ඇතුළුවීමට ඇති ඉඩ ඇහිරීම මගින් පරිගණකයේ මෘදුකාංග දෝෂ බොහෝමයක් වලක්වා ගත හැකියි. එය ඔබේ පරිගණය වේගවත්ව ක්‍රියාත්මක වීමටද හේතුවෙයි.
ඔබේ ලැප්ටොප් පරිගණයේත් වඩාත් සැලකිල්ලක් දැක්විය යුතු, ආරක්ෂා කරගත යුතු කොටස වන්නේ එහි LCD තිරයයි. තිරය අකුලා වැසීමේදී සැමවිටම තිරය තද නොවන සේ එහි මැදින් අල්ලා සෙමින් අකුලා දමන්න. එක් පැත්තකට බර කරමින් තිරය වැසීමේදී තිරයේ ඒ පැත්තේ ප්ලාස්ටික් සරනේරුව තදවීමෙන් නැවීමට හා පැලීමට භාජනය විය හැකියි. එසේම තිරය වැසීමේදී යතුරු පුවරුව හා තිරය අතර වෙනත් ආගන්තුක ද්‍රව්‍ය (පෑන් / ඉයර්ෆෝන් / පෙන් ඩ්‍රයිව්) නැති බව සැක හැර දැනගන්න. එවැනි වෙනත් කුමන හෝ බාධකයක් යතුරු පුවරුව මත තිබියදී තිරය වැසුවහොත් එමගින් තිරය තෙරපීමකට ලක්වීම නිසා එයට හානිවිය හැකියි. එමෙන්ම එයින් තිරය සීරීමටද ඉඩ තිබේ. තිරය සඳහා තිර ආරක්ෂකයක් යෙදිය හැකි නම් වඩාත් සුදුසුයි. එමගින් තිරය මත දුහුවිලි තැන්පත් වීම අවම වන අතර සීරීම් වලින්ද ආරක්ෂා වේ. කිසිවිටකත් තිරයෙන් අල්ලා ලැප්ටොප් පරිගණකය එසවීමෙන් වලකින්න. ඔබ තිරයෙන් අල්ලා පරිගණකය එසවුවහොත් පරිගණකයේ මුළු බරම තිරය දරා සිටින ප්ලාස්ටික් සරනේරු මතට යෙදීම නිසා ඒවා දුර්වල වීමට හෝ හානි වීමට හැකියි. සැමවිටකම ලැප්ටොප් පරිගණකය යටින් අත තබා ඔසවන්න. ලැප්ටොප් පරිගණකයේ LCD තිරය මත අනවශ්‍ය ලෙස තෙරපුමක් යෙදීමෙන් වලකින්න.
තවත් සැලකිලිමත් විය යුතු අංගයක් වන්නේ ලැප්ටොප් පරිගණකයේ පවර් කෝඩ් එකයි (විදුලි රැහැන). කිසිවිටකත් එහි වයරයෙන් අල්ලා ඇදීමෙන් වළකින්න. සැමවිටම පවර් කෝඩ් එකේ කෙළවර ඇති ප්ලග් එකෙන් අල්ලා වයරය ගලවා ඉවත් කළ යුතුයි. එසේ නොවුනහොත් වයරය ඇදීම නිසා මැදින් කැඩී යා හැකියි. එසේම පවර් සොකට් එකද හානියට පත්වීමට ඉඩ තිබේ. පවර් ඇඩැප්ටරය ස්ථීර ලෙස බිත්ති සොකට්ටුවට සවීවී තිබිය යුතුයි. එසේ නොවුනහොත් එහි තුඩු ඇද වීම නිසා හෝ අක්‍රමවත් සම්බන්ධක අග්‍ර නිසා පවර් ඇඩැප්ටරයට හානි සිදුවීමට ඉඩ තිබේ. පවර් ඇඩැප්ටරයෙන් එන වයරය සෑම විටම නොසෙල්වෙන සේ ලැප්ටොප් පරිගණකයට සවි කරන්න. එවිට හදිසියේම පා පැකිලීමෙන් හෝ වෙනත් එවැනි හේතුවක් නිසා පවර් කෝඩ් එක ඇදීයෑම වැලකේ. එමෙන්ම පවර් කෝඩ් එක මෙන්ම පරිගණකය සඳහා භාවිතා කරන වෙනත් සියළුම කේබල් පොළොව මතින් යැවීමෙන් වළකින්න. ඔබ පරිගණකය ඉදිරියේ වාඩි වී සිටීමට භාවිතා කරන පුටුවට කේබල් හසුවී හානිවීමට ඉඩ ඇති නිසා ඒ ගැන සැලකිලිමත් වන්න. බාහිර උපාංග හා කේබල් ලැප්ටොප් පරිගණකයට සම්බන්ධ කරන විට සෑම විටම එය නිවැරදි සොකට් එක දැයි විමසා බලන්න. බොහෝ විට පරිගණකයේ පිටත වැස්ම මත කුඩා රූපයක් ලෙස අදාල සොකට්ටුව කුමක් දැයි පෙන්වා තිබේ. වැරදි සොකට්ටුවකට උපාංග සම්බන්ධ කිරීමෙන් (උදා: නෙට්වර්ක් කේබලය වෙනුවට ෆෝන් වයරය) උපාංගය මෙන්ම සොකට්ටුවද දැවී යා හැකියි. එසේම ලැප්ටොප් පරිගණකයේ මව් පුවරුව දැවී යෑමේ අවදානමක් ද පවතී.
CD ධාවක වැනි ගලවා ඉවත්කර නැවත සවිකල හැකි Removable Drives භාවිතයේදී විශේෂ සැලකිල්ලක් දැක්විය යුතුයි. මේවා නොසැලකිලිමත් ලෙස භාවිතා කිරීමෙන් විවිධ හානි සිදුවීමට ඉඩ තිබේ. විශේෂයෙන්ම පරිගණකයෙන් ගලවා ඉවත් කල පසු මෙම ධාවක නිසිලෙස අසුරා තැබිය යුතුයි. භාවිතා නොකරන සෑම විටෙකම මේවා නිසි ලෙස ගබඩා කර තබන්න. මෙම ධාවක පරිගණකයට ඇතුළු කිරීමේදී නිවැරදි ලෙසට ඇතුළු කරන්න. උඩ යට මාරු කර වැරදි ආකාරයට බලෙන් ඇතුලත් කරන්නට යෑමෙන් ධාවකයට මෙන්ම පරිගණකයටද හානි සිදුවිය හැකියි. එමෙන්ම CD / DVD ධාවකයන්ට තැටි ඇතුළු කිරීමේදී ඒවායේ ලේබල නිසි ලෙස ඇලවී ඇත්දැයි බලන්න. ගැලැවුනු ලේබල ධාවක තුළ සිරවීම නිසා ක්‍රියාවිරහිත විය හැකියි.
කාළගුණ තත්ත්වයන් සැලකීමේදී අවට උෂ්ණත්වය ක්ෂණයකින් අධික ලෙස අඩු-වැඩි වීම ලැප්ටොප් පරිගණකයට හානිකර විය හැකියි. ඩෙස්ක්ටොප් පරිගණකයකට වඩා ලැප්ටොප් පරිගණකයක අභ්‍යන්තර උපාංග කුඩා ඉඩක් තුල ලං ලංව අසුරා ඇති බැවින් අභ්‍යන්තර උෂ්ණත්වය තරමක් වැඩි අගයක පවතී. එමෙන්ම අධික සීතලක සිට එක්වරම ලැප්ටොප් පරිගණකය ක්‍රියාත්මක කිරීමේදී සිදුවන තාප වෙනස නිසා හාඩ් ඩිස්ක් වැනි ධාවක වලට හානි විය හැකියි. එමෙන්ම කාර් එකක් වැනි වැසුණු රථයක් තුළ ලැප්ටොප් පරිගණකය තබා යෑමෙන් අධික උෂ්ණත්වයට එය ලක් වෙන්නා සේම සොර සතුරන්ට ද අත වැනීමක්ද වෙයි. සැම විටකම සමතලා මතුපිටක් මත ලැප්ටොප් පරිගණකය තබා භාවිතා කරන්න. මෙය හොඳ වායු හුවමාරුවකට හේතුවේ. එමෙන්ම හැකි සෑම විටෙකම ලැප්ටොප් පරිගණකය ක්‍රියාත්මක තත්ත්වයේ පවතින විට හොඳ වායු සංසරණයක් ඇති තැනක එය භාවිතා කරන්න. නැතහොත් ලැප්ටොප් පරිගණකයේ අභ්‍යන්තර උෂ්ණත්වය සීඝ්‍ර ලෙස ඉහළ යා හැකියි.
ලැප්ටොප් පරිගණකයේ සිසිලන පංකා පිහිටා ඇත්තේ පරිගණකයේ යට පැත්තේයි. අවට පරිසරයෙන් එකතුවන දූවිලි අංශු මෙම ෆෑන් පෙති හා ලැප්ටොප් පරිගණකයේ යට පැත්තේ දැල් කවුළු අහුරමින් තැන්පත් වේ. මේ නිසා වසරකට වරක් වත් ලැප්ටොප් පරිගණකයේ බාහිර ආවරණය ගලවා මේ දූවිලි පිරිසුදු කළ යුතුයි. මේ ලෙස පිරිසිදු නොකළහොත් දූවිලි එක්රැස් වීම නිසා ලැප්ටොප් පරිගණකයේ සිසිලන ක්‍රියාවලිය නිසිලෙස ක්‍රියාත්මක නොවන අතර එය අභ්‍යන්තර උපාංග වලට හානිකර ලෙස බලපෑ හැකියි. පරිගණකයේ සිසිලන පංකා ඇති ප්‍රදේශය පිරිසුදු කිරීම සඳහා භාවිතයෙන් ඉවත් කල දත් බුරුසුවක් භාවිතා කළ හැකියි.
ලැප්ටොප් පරිගණකය මත පොත්පත් වැනි බරැති දේ තබන්න එපා. මේ නිසා LCD තිරය යතුරු පුවරුවට තද වීම නිසා එයට හානිවිය හැකියි.
සෑම විටෙම ලැප්ටොප් පරිගණකය සඳහා ආවරණ බෑගයක් භාවිතා කරන්න. මෙමගින් සීරීම්, තෙරපීම් මෙන්ම අනපේක්ෂිත වැටීම් වලින්ද ලැප්ටොප් පරිගණකයට ආරක්ෂාවක් සැපයේ. බොහෝවිට ලැප්ටොප් පරිගණකයට හානි සිදු වන්නේ එය බිම ඇද වැටීම නිසායි. බෑගය මගින් ඒ සඳහා ද ආවරණයක් සැලසෙන නිසා හානිය අවම වේ.
බොහෝ විට ඔබත් නිදන කාමරයේ ඇඳ මත සැහැල්ලූවෙන් දිගාවී ලැප්ටොප් පරිගණකය භාවිතා කිරීමට හුරුවී ඇති. මෙය කෙතරම් සුව පහසු වුවත් මේ ආකාරයට නිරන්තරවම භාවිතා කිරීමෙන් එය පරිගණකයට හානිකර තත්ත්වයක් කරා යා හැකියි. ඇඳ මතුපිට ඇතිරිල්ලේ රැඳී ඇති කුඩා දුහුවිලි අංශු හා වෙනත් කුඩා දේවල් පරිගණකයේ යටි පැත්තේ තැන්පත් වීමෙන් වායු කවුළු අවහිර විය හැකියි.
මේ කරුණු පිළිපැදීමෙන් ඔබේ ලැප්ටොප් පරිගණකයත් හොඳ තත්ත්වයකින් තබා ගන්නට හැකි වේවි...
දිනපතා ඵලවන අලුත්ම ලිපි දැනගැනිම සදහාඅපේ facebook පිටූවට
like කලේ නැතිනම් like එකක්
දාගෙනම යන්න.
